Acts 20

Paulaꞌ Eesia-nameensiꞌketa Teing-koo Akaiaꞌ Eeꞌnoko Masedoniaꞌ Nanuuꞌnaꞌ

1Teketa tee naampa bakearako Paulaꞌ Karistooꞌnavitu-koo botoaruꞌ, eeꞌnoko puring-antavurira siꞌnooraꞌurira Epeses-navuntuꞌketa tenkenuuꞌ Masedoniaꞌaape. 2Masedoniaꞌnameensiꞌkoo Karistooꞌ sionuka aaꞌnaꞌ puring-antavurira Akaiaꞌnameensiꞌkoo basiaruꞌ. 3Eeꞌnoko teke beekuri kaara otouꞌ napoꞌ niiꞌning Karistooꞌ sionuka puring-antavurima. Teketa Siiria-nameensiꞌkoo aarerie kato beeꞌnaang mauꞌarama Juꞌnupoonge mumunsiaako taaravura Masedoniaꞌnameensiꞌke doonko toro-koo piavouꞌ aampariꞌuma. 4Niiꞌning nantoong tee ninka nariꞌ berouꞌ aing aaꞌning: Soopata Piirusi bauring, Beeriaꞌnung; Aristakas naanka Sekandas, Tesalonaikaꞌnamono-koonaanka; eeꞌnoko Kaiasi, Deebi-navuntuꞌkoong; eeꞌnoko Timoti; eeꞌnoko Tikikas naanka tee Toropimas, Eesia-nameensiꞌkoonaanka. 5Pilipai-navuntuꞌkoo basiarira ning Luukeꞌ kuneꞌmauꞌ. Teketa Paulaꞌ niꞌninka oꞌnoreko teing niiꞌning Toroasi-namono-aape aarerie kato berora teke niiꞌ nemaaruꞌ. 6Teketa Baariꞌkoong~ Paroro bakaang batei tankinuko aarerie meretuꞌ Pilipai-navuntuꞌketa, eeꞌnoko paꞌnokoꞌ doonge nanampikotaaꞌ Toroasia kuneꞌarampetuꞌ teing, teke eeꞌnooꞌke ~keꞌmunta-taa doong oꞌnoruꞌ.

Paulaꞌke Iutakasi Siroong-eta Duaꞌarako Daaꞌuuꞌnaꞌ Toroasi-navuntuꞌka

7Teketa Doong Uaanaꞌmung tankinuioꞌ muunga naroꞌmariruꞌ taamang meekung pisiꞌmeerima nai-koo. Mmeꞌ naiampiaꞌ Paulaꞌ tee daunaꞌmung tenkenuuꞌnaang piavoi kara isipoꞌ basi minkuvuuꞌ bera meuꞌnamang basiaruꞌ. 8Arakananka mmauꞌ daunavaro-koo niiꞌ naroꞌmariruꞌnooꞌke. 9Eeꞌnoko narung nemaka miring Iutakasi burung-koo baꞌnanui otokotaaꞌ doonko teke aasiꞌkoo duaꞌuuꞌ Paulaꞌ pankaroong karoko. Eeꞌnoko aasiꞌke puruꞌantavuioꞌ duaꞌaruꞌ beevarori-navaro-ita eeꞌnoko booꞌ aꞌdoonge daaꞌauꞌ. 10Eeꞌnoko Paulaꞌ doonko siarara tee-koo dau kinkinura bokoꞌura aaꞌpuuꞌ, “Noruꞌ mankiꞌdoriaukaꞌ aung-koo, aung enang domamparing.” 11Eeꞌnoko tenang Paulaꞌ deto koinura taamang meekung pisiꞌeera naiaara teing ninka minkuariko bera taneꞌpuruꞌ, eeꞌnoko tenang tenkenuuꞌ. 12Eeꞌnoko aaꞌnaꞌ domang kuaaꞌoroi teinge tee nemaka bakanooꞌ beꞌantavauꞌ domantooꞌ.

Paulaꞌ Melitaꞌaape Beuꞌnaꞌ

13Teketa tee Paulaꞌ kauꞌke Aasos-aape nanuꞌkoo piavoko niiꞌ aarerie urompiri meruꞌ. 14Eeꞌnoko teie teka kuneꞌmurira nariꞌ aarerie Mitilini-namono-aape meruꞌ. 15Daunaꞌmung aareri-koo aaꞌemarira Kaios-namuiꞌke deto tankinampira danto nariꞌ nanampiruꞌ bera teꞌmunga daunaꞌmung napoꞌ Semos-namuiꞌkoo duumemariruꞌ~. Teketa napoꞌ teꞌmunga daunaꞌmung Torokilian-navuntuꞌkoo aatumpiruꞌnooꞌketa tankinampira Melitaꞌnavuntuꞌkoo basimariruꞌ. 16Paulaꞌ tee Epeses-navuntuꞌ divuꞌkoo piavouꞌ teeꞌ Eesia-nameensiꞌkoo baruꞌ pankaroong otoarooꞌnaang, aiꞌ tee tee iriꞌnarumparama Jerusalemaꞌ beꞌkoo makotuko deekoꞌ Pentekos-naꞌmung nariꞌ nkoaavaꞌnaang. 17Teeꞌkoo Paulaꞌ Melitaꞌketa Epeses-aape botoaruꞌ dootuuꞌkoo urantanuka porora Paulaꞌ kuneꞌaavaꞌnaang teka Melitaꞌka.

18Eeꞌnoko tenang teing poroioꞌ teie aaꞌpuruꞌ, “Diiꞌke diiꞌka noruꞌmeri oꞌnong ning diiꞌkoo meuꞌke oꞌnokoꞌnaꞌ ookara batei-koo tutunaꞌnaꞌmung-eta aaꞌ Eesia-nameensiꞌ basimaruꞌnaꞌmung-eta. 19Ovoring tampaꞌ siompamaung boonko oꞌnoitaaꞌ, kontevoroma paaꞌariaining-koo biromarama, eeꞌnoko arooꞌmaritaaꞌ parapaara kuneꞌankooꞌ. 20Juꞌnupoonge orakaꞌ nkomaako teie kontemoaꞌ diiꞌkoo siraꞌpamaung kara sinang tampara nkavumaing nau-antarampima, sirakuraꞌ, niiꞌnooꞌ diikaning pava kanteama. 21Ookavitura-koo Juꞌnupoong eeꞌnoko Juꞌdeeaing daankiama teing Kumponing-aape bereꞌarira Ovoring Jiisuuꞌ baitoaavaꞌnaang tee domamuri taremuriainooꞌkoo tero Pakoꞌpariꞌniiꞌ. 22Eeꞌnoko enang ee aing Jerusalemaꞌaape memaang Tanuaang Meekunge aaꞌnaꞌ botomuioꞌ, nka noruꞌampaꞌ aming kapooꞌ ning-koo tavoꞌkuainge teka. 23Aꞌnooꞌ tee osi kante beeroꞌanko Tanuaang Meekunge naumumaung nantoonge ning kiimatamaavaꞌnaang eeꞌnoko baike kuneꞌampainaꞌ. 24Teka domamari oꞌnoainaꞌ baruꞌ aaꞌnaꞌ noruꞌmaravaꞌ, Ovoring Jiisuuꞌ bakaang nko-nko nkoama deekoꞌ dupe-antavamaꞌnaang botomuuꞌnaꞌ tee tampara doorenang Kumponing bakaang piaa-koong daankiama.

25“Eeꞌnoko enang tee diiꞌke ninge tee Kumponing bakaang muuꞌkoong kara koromarama daankirampimainge napoꞌ oing oomeriaukaꞌnung noruꞌansi oꞌnong. 26Teeꞌkoo ninge eeꞌ naurampimang diiꞌ, ning tee tuumpi oꞌnoaꞌ diiꞌkoo narung Kumponing bakaang muuꞌkoo tumparavaukaꞌnung deekoꞌ. Diiꞌka arisirariaing. 27Aiꞌ ning tee kontemoaung diiꞌkoo siraꞌpama tee ookara Kumponing bakaang pia. 28Tanatarariai diiꞌka eeꞌnoko ookara Kumponing bakanamanto Tanuaang Meekunge tare-koo botorurining. Pakuereriai teing dootuuꞌnupoong Karistooꞌ bakaning, baka bakaang erenge mooꞌuruꞌning. 29Aiꞌ ninge noruꞌansi oꞌnong ninge siꞌdampiko tee oreng nau-antanuka nkaunanka avorokesiꞌnanka-pinaꞌ diiꞌkoo meuꞌ poroaing opaariiꞌnaang temanto. 30Eeꞌnoko napoꞌ tevitu-eta diiꞌke tarevererimanavitu-eta niiꞌning nantoong donkonaavainge kara mareꞌai minkuaavaining teing Jiisuuꞌ bakaning barevarenuka barampaariiꞌnaang. 31Teeꞌkoo tanatarariaing diiꞌ, aiꞌ ning tee noruꞌmeri otong beenaumo mareꞌkoo muung eeꞌnoko doong uatepa tautaurampiruꞌnung taꞌdu ninka, diiꞌkoo niiꞌning duaꞌariainaꞌ noruꞌansi biromarama.

32“Eeꞌnoko enang tee ninge Kumponing bakaang bireng-koo siꞌdampimaang bakaang kara piaae tareruriiꞌnaang, tee eeꞌnara deto diiꞌ pankaꞌanta-koo makosi, eeꞌnoko tee barenku domang-anta tee diiꞌ oko-antaruriaing ookara Karistooꞌ bakaning deempuruꞌning ninka nariꞌ. 33Naning bakaning mooniꞌ dovang baarong keviꞌampaꞌ. 34Diiꞌke diiꞌka noruꞌmeri oꞌnong aing nkaning birenge taremaramaung, eeꞌnoko teing niiꞌning oꞌnorimaing nariꞌ pakuaramaunge. 35Ookara kapooꞌ ninge nkoankoꞌning teing ninge diiꞌ barerampiruꞌning diiꞌke teeꞌ nariꞌ kakeꞌiirarira teing aruaruꞌnuka pakuereriiꞌnaang tee Ovoring Jiisuuꞌ bakaang kara eeꞌ minkuvuuꞌnaare noruꞌeri, ‘Naning avuꞌnko biraankearavaing puruꞌuitaaꞌ tee naning nkavuaing.’”

36Eeꞌnoko tenang teeꞌ minkuvura tee doonko kinkinura teing ninka nariꞌ kunsiariruꞌ. 37Eeꞌnoko teinge ookarai biromparima Paulaꞌ bokoꞌaama siꞌnooraꞌauꞌ orarunsiarima baruꞌ eeꞌ minkuvuuꞌnaꞌkoo, “Diiꞌke napoꞌ oing oomeriaukaꞌnung.” 38Eeꞌnoko teinge berora aareri-koo koing-antavaara sipauꞌ.